நம்மைத் தொடர்ந்து இந்த பூமியில் வாழப்போகும் நமது வருங்கால சந்ததியினருக்கு ஒரு சிறப்பான, அழகான, மேன்மையான உலகை/ சமுதாயத்தை விட்டுச் செல்வது நமது பொறுப்பாகும். இது போன்ற ஒத்த கருத்தை உடைய கல்வியாளர்கள் நாங்கள் ஒன்றிணைந்து கல்வியை கருவியாகக் கொண்டு சமுதாயத்தில் பல மாற்றங்களையும் குறிப்பிடத்தக்க சில விஷயங்களையும் சாதிக்க இப்பணியைத் தொடங்கியுள்ளோம்.  இது நிச்சயமாக சாத்தியம். நம்மை தொடர்ந்து வரும் நம் வருங்கால சந்ததியினருக்கு நாம் விட்டுச் செல்லக்கூடிய சிறந்த பரிசு – சூழும் உலக விஷயங்களைப் பற்றிய தெளிவான அறிவு கொண்ட ஒர் சமுதாயம், சுய ஒழுக்கம் சிறந்த ஆரோக்கியம் மற்றும் சுகாதார விழிப்புணர்வு கொண்ட ஒர் சமுதாயம், மத பேதமற்ற ஒர் சமுதாயம், சிறந்த ஆளுமை மற்றும் நிர்வாக திறன் கொண்ட ஒர் சமுதாயம், எதிர்காலத்தைப் பற்றிய ஒரு தெளிவான தொலைநோக்குப் பார்வை கொண்ட ஒர் சமுதாயம், பெண்ணை அதிகார மையமாக போற்றும் ஒர் சமுதாயம், இயற்கையை நேசித்து  காப்பாற்றி பாதுகாக்கும் ஒர் சமுதாயம், மேலும் மனிதநேயத்தை முதன்மையாகக் கொண்டு மனித நேயத்தை மதித்து, பேணிக்காக்கும் ஒரு சமுதாயமே ஆகும். இது நிச்சயம் நிகழும் என்பதில் நாங்கள் உறுதியாக உள்ளோம்.

                இன்றைய கல்விச் சூழலில் பொதுவான எதிர்பார்ப்பாக இருக்கும் ஆங்கில மொழி வளாகம் மற்றும் LSRW திறன் மூலம் மொழிப்புலமை, இதை மட்டும் பறைசாற்றாமல், நாங்கள் சார்ந்த பள்ளிகளில் கருத்து அடிப்படை கல்வி மேம்பாட்டை முன்னெடுத்து செல்வோம். கடைபிடிப்போம்.  இன்று நிலவும்  இக்கட்டான வாழ்க்கை சூழலில் நமது மாணவர்களுக்கு அவர்கள் பயிலும் பாடத்திட்டம் பற்றிய ஓர் ஆழமான தெளிவான புரிதல் வேண்டும். அப்பொழுதுதான் அவர்களை ஆழமாக சிந்திக்கவும், சவால்களையும் பொறுப்புகளையும் ஏற்று வகுப்பறைகளை கடந்து உலகோடு இணைந்து இயங்கவும் வழிவகுக்கும். கருத்தடிப்படை கல்வி மாணவர்களை உலகில் மாற்றங்களை உருவாக்குபவர்களாகவும்,

                        ஒரு சிறந்த எதிர்கால உலகையும் சமுதாயத்தையும் உருவாக்குபவர்களாகவும் வடிவமைக்கும். நாங்கள் சார்ந்த பள்ளிகளில் உள்ள ஆசிரியர்களுக்கு கருத்தடிப்படை கல்வியை பற்றிய தெளிவும் கருத்தடிப்படை கற்பித்தலை எடுத்துச் செல்லும் வழிமுறைகள் மற்றும் நுணுக்கங்கள் பற்றிய ஆழ்ந்த சிறப்பு பயிற்சியும் வழங்கப்படும். இது ஆசிரியர்களுடன் நிற்காமல் மாணவர்களுக்கும் கருத்தடிப்படை கற்றல் வழிமுறைகளையும் நுணுக்கங்களும் சிறப்பாக பயிற்றுவிக்கப்படும்.

                         மாணவர்களுக்கு வழங்கப்படும் இணை பாடத்திட்ட நடவடிக்கைகள் அவர்களுடைய திறன் அறியும் விதமாகவும், திறன் வெளிப்படுத்தும் விதமாகவும், அறிவு சார்ந்தும், சமூக பொறுப்புணர்ச்சி தூண்டும் விதமாகவும், எதிர்காலத்தைப் பற்றிய ஒரு தெளிவான புரிதல் மற்றும் விளிப்புணர்ச்சியை தூண்டும் விதமாகவும், பாடத்திட்டத்தின் உட்கரு உனர்த்தும் விதமாகவும் அமையப் பெறும். மாணவர்களின் முழுமையான வளர்ச்சிக்கு உதவும் விதமாக இணை பாடத்திட்டம் எங்கள் ஆராய்ச்சி மற்றும் மேம்பாட்டு குழுவினரால் வடிவமைக்கப்பட்டுள்ளது.